Mannauðsdagurinn, sem fyrst var haldinn árið 2011, hefur vaxið og dafnað með hverju ári og er nú einn stærsti viðburður stjórnunar og mannauðsmála hér á landi. Árið 2019 sóttu ráðstefnuna um fimm hundruð gestir.
Á Mannauðsdeginum í ár verður fjallað um framsækna mannauðsstjórnun og hvernig hún er lykilinn að breyttri framtíð. Með nýrri kynslóð inn á vinnumarkaðinn, miklum og hröðum tæknibreytingum og COVID stendur mannauðsfólk núna frammi fyrir nýjum og spennandi áskorunum sem fela í sér fjölmörg tækifæri.
Fáðu þá fersku innsýn og stóru hugmyndir sem þú þarft til að halda vinnustaðnum þínum samkeppnishæfum. Bættu nýrri þekkingu og aðferðum í verkfærakistuna til að geta enn betur tekist á við helstu áskoranir og tækifæri sem mannauðsfólk, mannauðsstjórar og aðrir stjórnendur í íslenskum fyrirtækjum og stofnunum standa frammi fyrir.
Mannauðsdagurinn er vettvangur fyrir þá sem láta sig nútímalega stjórnun mannauðs varða. Fyrirkomulagið í ár verður, líkt og áður, blanda af fræðilegri og hagnýtri umræðu um mannauðsmál og stjórnun.