Mannauður í samvinnu við NOCA (dönsku mannauðssamtökin) bjóða félagsfólki sínu upp á sérhannaðan gagnvirkan rafrænan „masterclass“ með Jody Hoffer Gittell, höfundi kenningarinnar um Relational Coordination (tengslamiðaða samhæfingu) og einum fremsta fræðimanni heims á sviði árangurs skipulagsheilda, samvinnu og mannmiðaðrar forystu.
Flestar skipulagsheildir glíma ekki við það að starfsfólk vilji ekki vinna saman. Áskorunin felst frekar í því að kerfin, skipulagið og mannauðsferlarnir sem umlykja vinnuna gera árangursríka samhæfingu erfiða.
Í sífellt flóknari skipulagsheildum eru margar stærstu viðskiptaáskoranir í raun áskoranir sem snúa að samhæfingu. Upplýsingar þurfa að flæða greiðlega milli sviða, ákvarðanir að vera samræmdar og sérþekking að nýtast þvert á deildir og starfseiningar. Þrátt fyrir umtalsverðar fjárfestingar í samvinnu og leiðtogaþróun eiga margar skipulagsheildir enn erfitt með að ná þeim árangri sem stefnt er að.
Á þessum gagnvirka rafræna „masterclass“ mun Jody Hoffer Gittell fjalla um hvers vegna samhæfing – fremur en samvinna – er oft raunverulega áskorunin og hvernig mannauðsfólk getur gegnt lykilhlutverki í að skapa þær aðstæður sem þarf til að efla árangur skipulagsheilda.
Þátttakendur eru hvattir til að koma með raunverulega samhæfingaráskorun úr eigin starfsemi og velta fyrir sér hvernig skipulag, ferlar og mannauðsstarf hafa áhrif á getu fólks til að vinna árangursríkt þvert á deildir, svið og starfseiningar.
Jody Hoffer Gittel mun kynna og fjalla um:
- Relational Mapping sem hagnýtt verkfæri og þær grundvallarhugmyndir sem byggja á áratuga rannsóknum á Relational Coordination (tengslamiðaðri samhæfingu).
- Hvers vegna samhæfing er að verða einn mikilvægasti drifkraftur árangurs skipulagsheilda.
- Hvernig mannauðsferlar og starfshættir geta annaðhvort styrkt – eða óviljandi grafið undan – árangursríkri samvinnu.
- Hvernig greina má veikleika og rof í samhæfingu innan flókinna skipulagsheilda.
- Hagnýt líkön og aðferðir til að bæta samstarf og árangur þvert á svið og deildir.
- Stefnumótandi hlutverk mannauðsfólks við að skapa forsendur fyrir auknum árangri skipulagsheilda.
